Ethiopian Freight Forwarders and Shipping Agents Association

የግል የመልቲሞዳል ትራንስፖርት አከናዋኞች ፈቃድ አሠጣጥ ሥነ-ሥርዓት

የመጀመሪያዎቹ የግል የመልቲሞዳል ትራንስፖርት አከናዋኞች ረቡዕ መጋቢት 04 ቀን 2016 ዓ.ም በይፋ ታውቀው የዕውቅና ሰርቲፊኬት ወስደዋል፡፡ በብቸኛው የመንግሥት የልማት ድርጅት ሲሠራ የኖረው የመልቲሞዳል ትራንስፖርት አገልግሎት ከዚህ በኋላ አቅም አለን መስፈርቱንም እናሟላለን ለሚሉ የግል ባለሃብቶች ይፈቀዳል ተብሏል፡፡

ረቡዕ መጋቢት 04 ቀን 2016 ዓ.ም በሸራተን አዲስ ሆቴል የተደረገውን ሥነ-ሥርዓት ምሥራብ የተከታተለ ሲሆን ከፍተኛ የመንግሥት ሹሞች በተገኙበት በግል የመልቲሞዳል ትራንስፖርት አከናዋኝ ለሆኑ እና በውድድሩ ተሳትፈው ያለፉ ተቋማት ዝርዝር ይፋ ተደርጓል፡፡ በዚህ መሠረት ፓንአፍሪክ ግሎባል ኃላ.የተ.የግል.ኩ፣ ጥቁር ዓባይ ኃላ.የተ.የግል.ኩ እና ኮስሞስ መልቲሞዳል አ.ማ የተባሉ 3 ድርጅቶች በመንግሥት የወጣውን መስፈርት አሟልተው መገኘታቸውን የኢትዮጵያ ማሪታይም ባለሥልጣን ተናግሯል፡፡ መንግሥት ለነዚህ የግል ድርጅቶች ዕውቅና ከመስጠቱም በላይ በ6 ወራት የጊዜ ገደብ ወደሥራ እንዲገቡ ይህን ካልፈጸሙ ግን ፈቃዱን እንደሚነጥቅ ማሳሰቡን ምሥራብ ሰምቷል፡፡

በግላቸው የመልቲሞዳል ሥራን ለማከናወን ጥያቄ ያቀረቡት 8 ድርጅቶች ሲሆኑ ከነዚህ መካከል 3ቱ ብቻ መስፈርቱን ማሟላታቸው ነው የተገለጸው፡፡ ሁሉም አሸናፊዎች ሀገር በቀል ድርጅቶች ሲሆኑ በሽርክና ከተዋዋሏቸው ተቋማት ጋር በመሆን አገልግሎት ለመስጠት ተዘጋጅተዋል፡፡

የመንግሥት የልማት ድርጅት የሆነው የኢትዮጵያ የባሕር ትራንስፖርት እና ሎጂስቲክስ የፖሊሲ ከለላው ተጠብቆለት በመልቲሞዳል ትራንስፖርት አገልግሎት ሰጪነቱ ይዘልቃል፡፡

መንግሥት ለግል ባለሃብቶቹ መሠረታዊ በሆኑ የመሠረተ-ልማት እና የተቋማት ድጋፍ ለማገዝ መስማማቱን የትራንስፖርትና ሎጂስቲክስ ሚኒስትሩ ዶ/ር ዓለሙ ሥሜ በዕውቅና አሰጣጡ ወቅት ተናግረዋል፡፡

Share on

Facebook
Twitter
LinkedIn
Telegram
WhatsApp
Email